X. N Elias, conseill vos deman

X.

N Elias, conseill vos deman

De lieis c' am mais c' autrui ni me,

Que m ditz que m colgara ab se

Una nuoich, ab que il jur e il man

Que non la fortz part son talan,

Mas qu' eu estei baisan tenen:

Del far digatz m' al vostre sen,

S' es mieils c' aissi sofra et endur,

O part son voler me perjur.

N Aimeric, ie us vauc conseillan

Que, s' ab si us colga, faitz l' o be;

Car qui sa dompna en son bratz te,

Fols es s' aillor la vai cercan;

Car s' ieu era ab mi donz jazen

E n' avia fait sagramen,

Faria l' o, so us assegur,

Qui que m' en tengues per perjur.

N Elias a lei de truan

Me conseillatz er et ancse,

Mal a qui del conseill vos cre,

E sai ben que il fals vos creiran,

Cill que non amon tan ni quan;

Car dieu e sa dompna eissamen

Pert qui aisso que il jura men;

Per q' al tenen baisan m' atur

Ab cor que del far non perjur.

N Aimeric, vilania gran

Disetz e razonatz desse,

Car s' ab lieis jatz qu' am mais que me, 

Ja als non l' irai demandan,

Mas bellamen rizen, jogan,

L' o farai, puois plorarai m' en

Tro que m perdon lo faillimen;

Puois irai, pelegrins, part Sur,

Quer' en dieu perdon del perjur.

Aimeri de Péguilain et Elias d' Uisel.

BnF ms. 854 fol. 50v (imagen grande, bien escaneada)

IX, Gausselm, no m puesc estener

IX.

Gausselm, no m puesc estener

Qu' ab vos iratz no m contenda,

Que talan ay que defenda

Las domnas, a mon poder,

Que vos aug descaptener;

Qu' una m rent cortez' esmenda

Que m' avia fag doler,

Per qu' ieu en lor captener

Tanh que mos bels ditz despenda.

Bernart, ben sapchatz de ver

Que non vezem que ben prenda

A nulh qu' en domna s' entenda:

Per qu' ie us o fas ans saber

Que fol vo' 'n fassatz tener,

Ni qu' ela s' amor vos venda;

E no y metatz vostr' aver,

Que ben poiratz dechazer,

S' aviatz mil marcx de renda.

Gausselm, no us detz plus paor

De mi qu' ieu eys ni temensa;

Qu' en tal domn' ay m' entendensa,

Cui ser e prec et azor,

Que sap valer part valor:

Mas vos y faitz gran falhensa,

Quar descaptenes amor;

Qu' amor melhura 'l melhor

E l' aut auss' e 'l gensor gensa.

Bernart, per so n' ay temor

Quar conosc la mens valensa;

Qu' elas ab bela parvensa

Fan lo for del brezador,

E tornon hom en folor;

E quan l' an en lor tenensa,

Segon que dizon l' auctor,

Meton l' en tan gran error

Don ja non aura guirensa.

Gausselm, e com auzatz dir

Qu' enjans sia en amor fina,

Vas cui tot lo mons aclina?

Qu' ela fai gent esbaudir

L' irat, e 'l paubr' enrequir

Ab una cuenda metzina;

Que ja pueis, al mieu albir,

Hom non pot dolor sentir,

Mas ela 'l sia vezina.

Bernart, garda us de trahir

D' esta vostr' amor frairina,

En cui malvestatz s' aizina:

Mas s' ill voletz ben servir

Ni sos talans ademplir,

Corba ill be soven l' esquina;

E gardatz vos al partir

Que no us puesca escarnir,

Qu' ela sap trop de rapina.

Gausselm, en vos no s tayna

Vilas motz ni lagz a dir;

Per qu' ieu vuelh aissi fenir

Ma razo qu' es bon' e fina.

Bernart, anc d' amor canina

No vim nulh home jauzir;

E si no us voletz gequir,

Tira us lo cat per l' esquina.

                Bernard et Gaucelm.