XXXVI. Concordia et approbatio mutua inter Ildefonsum, Regem Aragonum et ecclesiam Tarraconensem

XXXVI.

Concordia et approbatio mutua inter Ildefonsum, Regem Aragonum et ecclesiam Tarraconensem super venditionibus ab unoquolibet ipsorum in territorio Tarraconensi factis, anno MCLXXV. (1175) (Vid. pág. 163.)

Ex autogr. in archiv. ejusdem ecclesiae.

Haec est concordia facta inter Dominum Ildefonsum, Regem Aragonensem, Comitem Barchinonensem et Marchionem Provinciae, et Berengarium Terrachonensem electum, super empcionibus, quas Dominus Rex et ecclesia Terrachonensis fecerant in ipso campo de Terrachona. Laudavit itaque atque concessit Dominus Ildefonsus Rex jam dictus jam dicto electo, et ecclesiae Terrachonensi illam compram, quam fecerant de Arves de Alanzon, ut habeant illam in perpetuum, sicut ab ipso comparaverunt, absque omni parte, quam ibi non demandet Dominus Rex vel sui. Similiter jam dictus Terrachon. electus et canonici ejusdem ecclesiae laudaverunt, atque concesserunt Domino Regi et suis illam compram, quam fecerat in Villa grassa, ut ipsi nec sui successores nullam partem ibi requirant. Quidquid de caetero comparaverint, vel aliquo modo illis evenerit, praeter quod ecclesiae de functionis fuerit oblatum, habeant et dividant inter se, sicut in carta continetur, quae fuit facta inter Dominum Comitem Barchinon., et Dominum Bernardum, Terrachon. Archiepiscopum. Actum est hoc apud Terrachon. mense februari anno ab Incarnatione Domini millessimo centessimo septuagessimo quinto. = Sig+num Ildefonsi, Regis Aragonensis, et Marchionis Provintiae. = Sig+num Sancia, Regina, (sobra la coma) Aragon. (,) Comitissa Barchinon. et Marchisia Provintiae. = Sig+num R. de Munellis. (Mulnellis, Mulnells) = Sig+num Raymundi de Monte catano. = Sig+num Geraldi de Jorba. = Ego Bernardus de Calidis, scriba Regis scripsi cartam.

XXIX. Institutio operarii in ecclesia Urgellensi, anno MCLXXV. (1175)

XXIX. 

Institutio operarii in ecclesia Urgellensi, anno MCLXXV. (1175) (V. pág. 192.) 

Ex libro I. Dotal. eiusd. eccl. fol. 250 b. 

In nomine Ihesu Christi Salvatoris eterni: ego A. Dei gratiâ Urgellensis episcopus, cum consilio et comuni voluntate omnium canonicorum Urgellensis ecclesiae, commendo tibi Raymundo Lambardo opus beatae Mariae, cum omnibus rebus tam mobilibus quam immobilibus, scilicet, mansos, alodia, vineas, census, et cum oblationibus oppressionum et penitentialium, et cum elemosinis fidelium, et cum numis clericorum, et cum omnibus illis, quae hucusque vel in antea aliquo titulo videntur spectasse sive spectare ad prephatum opus beatae Mariae. Et preterea damus tibi cibum canonicalem in omni vita tua, tali videlicet pacto; ut tu fideliter et sine omni enganno claudas nobis ecclesiam totam, et leves coclearia sive campanilia, unum filum super omnes voltas, et facias ipsum cugul bene et decenter cum omnibus sibi pertinentibus. Et ego R. Lambardus convenio Domino Deo, et beatae Mariae, et domino episcopo, et omnibus clericis Urgellensis ecclesiae, qui modo ibi sunt, vel in antea erunt, quod hoc totum, sicut superius scriptum est, vitâ comite, perficiam ab hoc presenti Pascha, quod celebratur anno dominicae incarnationis M.° C.° LXXV.°, usque ad VII annos fideliter, et sine omni enganno. Ita quod singulis annis habeam et teneam ad servitium beatae Mariae, me quinto, de lambardis, idest IIII.or lambardos et me, et hoc in yeme et in estate indesinenter. Et si cum istis potero perficere, faciam; et si non potero, addam tot cementarios, quod supra dictum opus consumetur in prephato termino. Post VII vero annos, cum iam dictum opus, divina misericordiâ opitulante, complevero, habeam libere et quiete cibum meum dum vixero, et de honore operis et avere stem in voluntate et mandamento capituli postea. Preterea nos, tam episcopus, quam canonici, omnino prohibemus tibi Raymundo Lambardo, quod per te, vel per submisam personam, non alienes vel obliges aliqua occasione quicquam de honore operis, quae modo habet, vel in antea habebit. De tuo itaque honore, quem nomine tuo adquisisti, et de avere, fac in vita et in morte quod tibi placuerit post illud septennium. Si forte, quod absit, tanta esterilitas terrae incubuerit, quod te nimium videamus gravari, liceat nobis prephato termino addere secundum arbitrium nostrum, ne notam periurii incurras. Sed aliquis vel aliqui nostrum praedictam relaxationem sacramenti facere tibi non possit, nisi in pleno capitulo, comuni deliberatione et consensu omnium. Et quicquid melioraveris in honore operis, remaneat ad ipsum opus. Si vero pro melioracione honoris operis oporteret te aliquid impignorare vel comutare, non possis hoc facere sine consilio et conveniencia capituli. Iuro ego R. Lambardus, quod hoc totum, sicut superius est scriptum, perficiam, et fidelitatem et indempnitatem canonicae beatae Mariae Urgellensis ecclesiae pro posse meo, per Deum, et haec sancta evangelia. = Sig+num R. Lambardi, qui hoc iuro, claudo, et confirmo. = Sig+num domni Arnalli Urgellensis episcopi. = Sig+num Guillermi prioris. =  Sig+num W. sacristae. = Sig+num B. archidiacono. = Sig+num P. archidiacono. = Signum R. de Adautes, archidiacono. = Sig+num B. de Sancta Fide, archidiacono. = Sig+num B. cantoris. = Sig+num Bernardi Anascensis scriptoris, qui hoc scripsi sub rogatione Arnalli capellani de Iel, die et anno quo supra.

XXXVIII. Bernardi abbatis Cardonensis ad Alexandrum papam III. epistola, data post annum MCLXXV. (1175)

XXXVIII. 

Bernardi abbatis Cardonensis ad Alexandrum papam III. epistola, data post annum MCLXXV. (1175) (V. pág. 205.) 

Ex eod. arch. 

Noscat sanctitas vestra, Pater Sanctissime, quod quaedam ecclesiae sunt in confinibus Cardonae, spectantes adiudicari ecclesiae Sancti Vincentii de Cardona, quae chrisma et oleum sanctum in ecclesia Sancti Vincentii suscipiunt, nec usque ad tempora ista clerici praefatarum ecclesiarum ad synodum Urgellensem ierunt. Suplico ergo sanctitati vestrae ego Bernardus abbas de Cardona, ut episcopo Urgellensi districtius praecipiatis, quod in aliquo ecclesiis de Clariana, de Begursio, et de Matamargo in synodis, nec in aliis gravare praesumat. Item insinuo vobis, quod a morte domini nostri Raimundi Fulconis (1: Qui ann. 1175 occisus est. ), felicis recordationis, tanta est guerra inter homines de Cardona, et traditores qui eum interfecerunt, quod nullus de Cardona potest exire, nisi armatâ manu. Unde cum me ad synodum Urgellensem oporteat ire, mihi insidiae a iam dictis proditoribus parantur, ut capiant me, vel interficiant. Suplico ergo Sanctitati vestrae, ut episcopo Urgellensi districtius praecipiatis, quod quamdiu guerra ista duret, me ad synodum suum minime venire compellat: nullo enim modo in itinere possum vitare ego, vel aliquis Cardonensium clericorum, discrimen mortis, vel carceris.