XXVI. Poncii de Vilamur, Episcopi Urgellensis epistola ad R. E. Legatum super facto haeresis Comiti Fuxensi attributae certe posterior anno MCCLI.

XXVI. 

Poncii de Vilamur, Episcopi Urgellensis epistola ad R. E. Legatum super facto haeresis Comiti Fuxensi attributae certe posterior anno MCCLI. (Vid. pág. 87). 

Ex arch. Eccl. Urgell. 

Venerabili in Christo Patri ac Domino Dei gratia Sacrosanctae Romanae Ecclesiae Legato in partibus Tolosanis, P. per eandem Urgellensis Episcopus, salutem in Domino Jhesu Christo. Super adventu vestro, quem futurum utilem toti Ecclesiae Dei credimus, et speramus, gaudemus in Domino, devotioni et discretioni vestrae pariter offerentes servicium et honorem, et quicquid possimus ad exaltationem totius Ecclesiae generalis. Et quoniam expedit vobis, et nobis etiam, explicare quae facta sunt in partibus istis contra Comitem Foxen. ne possit vos decipere per ignorantiam vel errorem facti, duximus paternitat vestrae praesentibus intimanda breviter, sperantes quod Dominus Episcopus Tolosanus et alii praelati illius terrae, quibus super hoc scripsimus, magnitudini vestrae refferent illud idem. Hinc est igitur quod cum per Fratres Praedicatores, et Minores, et alios viros religiosos, qui ad inquirendum super facto haeresis in terra Comitis Foxen. et R. filii sui, quae est in Diocesi nostra constituta, nobis manifeste constiterit plures hereticos et credentes eorum erroribus, et faventes et celatores, et deffensores in Castrobono (Castellbó) et in locis circumpositis latitare, quae quidem loca sunt praedicti Comitis et filii sui; nos cupientes, ad extirpandum semen illud nefarium de terra illa, procedere praevia ratione, sepe dictum Comitem monitum multociens, ut ipsos hereticos in judicio exhiberet, contumacem excommunicavimus, et postea per sententiam eumdem denunciavimus deffensorem hereticorum, celatorem pariter et fautorem et excommunicatum. Tandem convenientibus ad locum personaliter Dominis Terrachonensi electo, Ilerdensi et Vicensi Episcopis, et multis aliis viris religiosis et discretis, permisit dictus Comes inquisitionem fieri in Castrobono, et in locis praedictis, et inventi fuerunt plus quam LX heretici et credentes. Qui omnes, praesentibus Comite et filio suo, fuere per Dominum Terrachonensem et alios Episcopos de heresi in judicio condempnati. Cumque Domino Tolosano et Domino Carchassonensi, et etiam Domino Archiepiscopo (pone Arhiepiscopo) Narbonae, et fratri F., et fratri G. A. de ordine Praedicatorum, fuissent haec omnia reserata, nescimus quid vel qualiter vel quare contigit quod dictus Comes non vitatur ab illis, sicut excommunicatus. Quod vobis significamus ideo, ut si qua sunt omissa forte per incuriam, per vestram diligentiam supleantur, et ut possitis comprehendere utrum sepe dictus Comes in tenebris ambulat vel in lucem. Praeterea noveritis nos nuper Terrachonam ivisse, et super hoc Dominum Archiepiscopum et Praedicatores, qui supradictis omnibus interfuere, consuluisse. Ex quorum habuimus consilio quod omnia ista vobis exponeremus et ipse Dominus Archiepiscopus, pergens in Navarram et Castellam causa visitationis, scripsisset vobis super hoc, si adventum vestrum per aliquem prescivisset. Qui dixit nobis quod ex parte sua vos rogaremus statim cum veniretis, ne in absolucione dicti Comites et facto ipsius et filii sui sine assensu eius et nostri, qui plura novimus et intelleximus etiam post latam sententiam in negocio eorumdem, quae ad praesens in absentia Domini Archiepiscopi non possumus vobis scribere, procederetis, nisi forsan per alia aminicula in facto heresis possetis procedere contra ipsos. Ideoque super praemissis dominationem vestram humiliter deprecantes rogamus, ne moleste feratis quia sollempnes nuncios vobis non missimus; non enim habemus qui audeant ire, et credimus per latorem praesentium totam rei seriem secretius nunciare. Datum in Sede IV. Kalendas Januarii.

XXV. Ejusdem litterae quibus, descripta primum epistola Comitis Fuxensis ad Rom. Pontif. de quaerimoniis quas habebat adversus Episcopum Urgell., eundem de agendis admonet super lite cum praedicto comite; circa annum MCCLII

XXV. 

Ejusdem litterae quibus, descripta primum epistola Comitis Fuxensis ad Rom. Pontif. de quaerimoniis quas habebat adversus Episcopum Urgell., eundem de agendis admonet super lite cum praedicto comite; circa annum MCCLII (Vid. página 86.) 

Ex arch. eccl. Urgell. 

Hic est tenor litterarum, quas misit Comes Fuxensis contra Episcopum Urgellensem. "Sanctissimo in Christo et caetera. Vestrae sanctitatem clementiae regraciandam duximus de multitudine gratiarum, quas mihi vestro famulo olim de mera liberalitate vestra et gratia, non meis exigentibus meritis, manum largifluam impendistis, pro quibus totis visceribus vobis et vestris grates obsequiosius meus animus est paratus, si facilius aliquo tempore se offerret, quamquam in hac parte mihi vel meis de condigno retribuendo servitio suppetere non video facultatem. Et utinam mea vita comite locus et tempus congruum ad praedicta peragere se oferrent. Ductus tamen illius confidentia benignissimi Domini coelestis principis, cuius vices in terra geritis, et condigne, apud quem in bonis pro facto voluntas acceptabilis reputatur, me totum et mea omnia, ac amicos et universos vestris omnino beneplacitis et bona gratis offero voluntate, et ad ex debito carnis prosapiae et consanguinitatis lineae recognosco fateor me teneri, cum de illius magnitudine generis Comitis Barchinonae, ut vestrum, descendit genus meum. Quare non modicum, immo multum vereor et confundor, si quid vestrae auribus sanctitatis de persona mea et hominibus terrae meae insinuaretur sinistrum, videlicet, quod ego aliquid comittam erga Dei Ecclesiam sponsam vestram, vel aliqua eius membra, quod vobis valeat displicere. Verus etenim, ac utinam pius, pater Dominus Poncius Episcopus Urgellensis non credat suficere nisi plures exharadaciones meas et homines terrae meae injuriose et detineat, et quia me et terram meam guerris affligat gravissimis et injustis me cogit huiusmodi suspicari, et pro eo quod me injuste utroque gladio persequitur, deffensioni intendo legitime terrae meae, et quod guerrarum dicti episcopi et fortunii progenitores mei et ego diffuse et injuste amissimus, quando eiusdem urgente guerra, permittente divina gratia, juste recupero paulatine; quod totum de facili costare poterit vestrae clementiae per diversas treugas hinc inde inter nos initas mutuo, et ab eodem et suis factas hominibus, non absque multorum strage meorum hominum, facta etiam ab eadem et violatione, si dici liceat, quod me pudet, proprii jurament, quarum treugarum transcripta sub sigillis autenticis sigillatis vestrae benignitatis dulcedini duxi trasmittenda. Ideoque confisus de vestrae clementiae liberalitate sanctitate vestrae humiliter supplicare non vereor, et devote, quatinus mihi et meo procuratori praesentium portitori, ut pius pater et bonus et Dominus more solito gratiam conservare dignemini, et favorem, ac eius Domino Domino Episcopo vestris dare litteris in mandatis, ut me admittat ad concordiam et ad pacem quam eidem obtuli multotiens, novit Deus, cum animo faciendi ad bonorum virorum notitiam parti neutrae minime suspectorum; quod adhuc sum paratus facere, et ut me obtuli vestris judicibus, ut peracta vobis costare poterit, adhuc benignissime offero me... mandet mihi vestrae clementiae ipsius famulo beneplacitum suum omne: paratus sum etenim mandatum ipsius pro viribus effectui mancipare. Datum Nonis Febroarii.” = Oblatae fuerunt litterae istae Domino Papae apud Perusium XIV. Kalendas Maii. = Ne vero per adulationis astucias, ac ficta mendatia et dolosa detrahi valeat juri vestro super injuriis, dampnis castrorum, possesionum occupationibus, vobis et terrae vestrae et hominibus indebite irrogatis, testimoniales proborum litteras contrarias remittatis, quam cito poteritis. Consulo tamen vobis, ut praesenti tempore cum eo potius componatis, intendentes sollicite vestris resistere adversariis viriliter et prudenter pariter et potenter; nam causa huiusmodi in qua ad diminutionem capitis agitur, omnes causas excedet alias temporales, et ubi maior periculum vertitur, maior debet adhiberi cautela. Litteram vero quam Ricardus de (Cervaria)... Guillermus de Fluvianou (Fluviano, Fluviá) Arnaldus de Carrol contra vos apud sedem Apostolicam impetrarunt per fratrem Guillelmum et Raimundum Ordinis Catholicorum vobis consimilem destinamus sub Bulla Domini Papae ac tenorem... procurabant, quem corrigi fecimus eis renitentibus et... prout in tenore eiusdem poteritis plenius intueri, quem vobis mittimus, interclusum. Et iidem plures litteras defferentes... multipliciter infamarunt de pluribus et de multis, quae tacenda sunt potius ob eorum turpitudinem, quam litteris intimanda, quae in praedictis litteris habebantur, et ipsas Domino Papae litteras obtulerunt, quarum tenorem comprehendere nequibimus exceptis illis litteris, quae vobis sunt diucius destinatae. Litteras vero Guillermi de Jouverre vobis mittimus, quae ultimo sunt obtentae. Miror tamen et admiratione dignum est, quod procurationem vestram et capituli vestri solummodo transmissistis mihi contra eum, ac processum... habitum coram judicibus delegatis retinuistis penitus, et causae merita merito ignorabam. Tamen causa remittitur ad judices contentos in littera quam mitto vobis. Miror insuper, et possum merito admirari, quia procuratorium in causa Fuxensis Comitis non missistis sigillo vestro una cum sigillo capituli sigillatum in forma quam vobis misseram diu est in quadam sedula; nam cum sigillum habeat capitulum, ad agendum pro ipso capitulo non sufficit sigillum vestrum; et licet quandam sedulam vestram habeam in qua capituli sigillum dependet, capituli sigillum suspectum habeo. Et ideo vereor... quia videtur fuisse appositum viciose, cum exteriori parte cera appareat lividior et planior, et in colore peccaret, licet P. de Livi... assereret costanter sigillum fuisse impositum ab eo, qui eius habet custodiam fideliter. Et idcirco aliquantulum negotium retardatur, remittentes procuratorium per quod procedi valeat sine mora. Formam vobis mitto interius interclusam. Item sciatis quod processum totius negotii Comitis Fuxensis restituere debeo mercatoribus in obligationem in festo Beati Joannis Baptistae proxime venturo, prout eis promissimus interposito juramento de voluntate Fratris Raimundi.