Perg. n° 27. 3 ene. 1134, Raimundus Berengarii, barchinonensis comes, marchio

VI.

Perg. n° 27. 3 ene. 1134.

In Dei eterni regis nomine. Ego Raimundus Berengarii Dei gratia barchinonensis comes et marchio dono etiam omnipotenti Deo redemtori meo et Sancte milicie templi Jerosolimitane Salomonis cum asensu et confirmacione et cum laudamento baronum meorum in manu ejusdem Arnalli de Bedoce et Hugonis Rignadi cumfratris societatis eorum quoddam kastrum nomine Barberano in nostra marchia contra sarracenos cum militibus qui ipsum kastrum pro me habent et cum omnibus ad idem chastrum pertinentibus et cum terminis et possesionibus suis et totam dominationem cum serviciis et usaticis suis sicut melius ibi Deus dederit vel ego habere debeo ut libere et sine dominatione et sine blandimento ullius hominis presentes confratres et successores eorum quando illi venerint et steterint cum armis in Granjana aut in predictu marchia ad defensionem christiniatatis (christianitatis) secundum institutionem ordinis milicie sue habeant hec omnia predicte milicie quod superius scriptum est cum augmentacionibus quas Deus ibi dederit et disponant in perpetuum. Hec quippe omnia dono pro anima patris mei et matris mee et mea ut Deus omnipotens dirigat actus meos et faciat me venire in suo 
servicio ad bonum finem et peccata et offensiones clementer dimitat. Hanc itaque voti mei oblationem si qua in crastinum cujuscumque dignitatis aut mediocritatis persona violare temptaverit nisi cito se contraxerit deleatur nomen ejus de libro vite et cum Anania et Saffira voti sui fraudatoribus damnacionem incurrat.
Sig+num Raimundi Comes qui hoc donum punctatim firmavit ceterisque firmari rogavit.
Actum est III° nonas januarii anno dominice incarnationis C tricesimo IIII° post millessimum anno XXV regnante Leudovici regi.
(Sig+num) Bernardus vicecomes.
Sig+num Raimundus Dei gratia ausonensis episcopus.
Sig+num Guillelmi Raimundi Dapiferi.
Sig+num Reiambaldi de Baselia.
Sig+num Berengarii de Kerallt.
Sig+num Guillelmi Raimundi de Pugallt.
Sig+num Petri archilevite. 
Sig+num Raimundi de Rocha.
Sig+num Berengarii Bernardi Dapifer.
Sig+num Arnallus Berengarii de Anglerola.
Sig+num Berengarii Bernardi de Granjana.
Sig+num Deusdedit.
Sig+num Bernardi Guillelmi de Lucciano. 
Bernardus sacerdos qui hoc scripsit die et anno quod supra.

XXXII. Summa processus electionis F. Guillelmi de Barberá, Prioris conventus Praedicatorum Barcinonen. in Episcopum Illerdensem.

XXXII.

Summa processus electionis F. Guillelmi de Barberá, Prioris conventus Praedicatorum Barcinonen. in Episcopum Illerdensem. (Vid. pág. 142.) 

Ex Tabul. Illmi. Archiep. Tarraconen.

Anno Domini millesimo ducentesimo quadragesimo septimo, mense septembri, vacante ecclesia Illerdensi, cum canonici de electione concordare non possent, compromisserunt in duos eorum, quos ad Sedem Apostolicam transmisserunt, ut de voluntate et consensu Domini Papae Episcopum eligerent. Cumque hoc esset in derogationem juris Metropolitani, ad quem electio devoluta videbatur nihilominus, volens deferre appellationi per Capitulum Illerdense ad ipsum Dominum Papam interpositae, misit nuntium suum ad curiam Romanam supplicans Domino Papae et Cardinalibus, quod jus sibi competens salvare dignarentur. Cumque super hoc inter syndicos Capituli, et dictum nuntium Archiepiscopi esset coram Sanctissimo diutius altercatum, Dominus Papa habito super his consilio, scripsit eidem Archiepiscopo, et Fr. Raymundo de Peñaforti, et Fr. Michaeli (de Fabra) Praedicatorum ordinis in hunc modum.

Innocentius Episcopus servus servorum Dei. Venerabili fratri Archiepiscopo Tarracon. et dilectis filiis Raymundo de Pennaforti, et Michaeli, doctori theologiae, fratribus ordinis Praedicatorum salutem et Apostolicam benedictionem. Illerdensis ecclesia Pastoris regimine destituta, cum dilecti filii, Capitulum eiusdem, vocatis Roten. canonicis et omnibus aliis, qui debebant et poterant interesse, praefixa electioni die convenissent in unum ad habendum de futuri Pontificis substitutione tractatum, et in unam non possent concordare personam, tandem duos canonicos ex se ipsis ad Sedem Apostolicam transmiserunt, conferentes illis unanimiter potestatem ut vice ipsorum omnium et nostro consilio et assensu personam idoneam eligerent in Pastorem. Illis autem in nostra praesentia constitutis, fuit pro te, frater Archiepiscope, propositum coram nobis, quod dicti canonici ad eligendum admitti aliquatenus non deberent, cum tam ipsi quam praedictum Capitulum eligendi facultatem propter lapsum temporis amisissent, propter quod erat ad te potestas provisionis huiusmodi devoluta. Cum autem super his coram nobis et fratribus nostris fuerit aliquamdiu disceptatum, nos de ipsorum consilio, prudentiae vestrae auctoritate praesentium duximus commitendum, ut cum vos in hac parte plenius considerare possitis circunstancias universas, et scire merita personarum, de persona idonea ipsius ecclesiae, vel alterius, si digna non reperiatur in ipsa, provideatis eidem: contradictores per censuram ecclesiasticam appellatione post posita compescendo, non obstante si ordini vestro, dilecti filii Raymunde et Michael, a Sede Apostolica sit indultum, quod per litteras ipsi fratres eiusdem ordinis se de causis intromittere non teneantur inviti, nisi de indulgentia huiusmodi plenam fecerit mentionem. Quod si non omnes his exequendis potueritis interesse, tu, frater Archiepiscope, cum eorum altero ea nihilominus exequaris. Dat. Lugduni nono kalendas januarii pontificatus nostri anno quinto.

Nos igitur Petrus Dei gratia Tarraconensis Archiepiscopus, Fr. Raymundus de Pennaforti, et Fr. Michael, habito super his diligenti tractatu, consideratis statu Illerdensis ecclesiae, et meritis personarum sexto nonas martii de persona fratris Guillelmi de Barberano, Prioris fratrum Predicatorum Barchinonae, viri religiosi, providi et honesti, cui morum honestas, litterarum scientia et alia merita suffragantur, eidem ecclesiae duximus providendum. Et sic omnes tres scripserunt Capitulo Illerdensi, ut consentiret electioni praedictae eorum. Et sic octavo idus martii confirmatus est, et juravit Tarrachonae in manu Domini Archiepiscopi obedientiam, etc.

XXVII. S. Raymundi de Peñafort epistola ad Poncium de Villamuro, Urgellensem Episcopum super facto inquisitionis in hereticos exercendae circa an MCCL.

XXVII. 

S. Raymundi de Peñafort epistola ad Poncium de Villamuro, Urgellensem Episcopum super facto inquisitionis in hereticos exercendae circa an MCCL. (Vid. pág. 90). 

Ex autogr. in arch. Eccl. Urgell. 

Venerabili in Christo Patri P. Dei gratia Episcopo Urgellensi Frater R. de Pennaforti, salutem et orationes in Domino. Quid faciendum sit de R. de Vernigol, qui propter heresim dicitur esse captus, non est meum precipitare sententiam. Cautum tamen videtur, ut suspendatur negocium, et custodiatur bene miles, donec videritis omnes litteras, quae super negotio fidei scriptae fuerunt a Sede Apostolica Domino C. condam procuratori Tarrachonensis Ecclesiae; et tunc secundum concilium, statuta Domini Papae noviter contra hereticos promulgata, et illas formas poteritis, habito diligenti consilio cum praelatis, et aliis Deum timentibus, ac fidei zelatoribus, id quod sibi et Ecclesiae utilius, et securius fuerit, providere. De illis quoque, qui Xatberto de Barberano in sua fuga ducatum, et auxilium prestiterunt, quid possum aliud dicere, nisi quod juxta formam Concilii, et praefata Domini Papae statuta contra fautores hereticorum edita, tam in absolucione, quam in aliis procedatis, et postmodum, vel de eundo ultra mare, vel in frontaria contra Sarracenos, taxato eis tempore congruo, quo ibi debeant deservire vel si hoc non poterunt, aliquid aliud juxta vestrum arbitrium poteritis talibus pro penitentia imponere salutari. Ita tamen caute in omnibus procedentes, quod enormitas tanti facinoris non remaneat inpunita, et qui vere penitent ex nimio rigore desperationis laqueum non incurrant. Orate pro me. Quod autem fidei negocium prosequamini diligenter, et R. de Josa qui pro negocio fidei molestias patitur, vestris consiliis et auxiliis quantum decuerit et licuerit, foveatis, quia vobis ex officio pastorali incumbit, et alias, nisi fallar, estis fidei zelatores; suadere vobis aliquid super hoc supervacuum videretur.