XIII.
Scheda notarii qua ostenditur D. Petrum, Infantem Portugalliae, qui maiorem Balearium insulam inter alia a Jacobo I, Aragonum Rege in feudum habuerat, ante annum 1256. denatum fuisse. (Vid. pág. 48.)
Ex originali quam FF. Capucc. Maioric. casu adquisiere.
XII. kalendas augusti MCCLVI.
Sit omnibus manifestum quod ego Berengarius de Tornamira, tenens locum domini Regis in regno Maioricarum, recepi litteras apertas a domino Rege sigillatas suo sigillo minori, quarum tenor talis est:
"Jacobus, Dei gratia Rex Aragonum, Maioricarum et Valenciae, Comes Barchin. et Urgelli et dominus Montispesulani, dilecto suo Berengario de Tornamira, tenenti locum nostrum in regno Maioricarum, salutem et dilectionem. Dicimus et mandamus vobis firmiter: quatenus de primis denariis quos collegeritis de redditibus sive exitibus nostris Maioricarum, donetis et solvatis Episcopo Maioricen. et aliis manumissoribus testamenti dompni P. Infantis Portugaliae, viginti milia sol. regalium Valenciae, vel ipsos eis assignetis in dictis redditibus, et hoc non mutetis aliqua ratione: taliter facientes quod ultima voluntas dicti Infantis P. valeat adimpleri. Datum Tirassone II. kal. julii.”
Unde ego Berengarius de Tornamira praedictus volens adimplere et executioni mandare praedictum mandatum domini Regis, prout superius in suis litteris continetur, mitto vos R. Dei gratia Maioricen. Episcopum, et alios manumissores domini P. Infantis Portugaliae bonae memoriae quondam, in possessionem reddituum regni Maioricarum, quos dominus Rex recepit vel recipere debet in insula Maioricarum, et illos vobis assigno pro illis viginti millibus solidorum regalium Valenciae; de quibus tamen est vobis satisfactum de M.DCCC. minus III sol.; et sic remanent in suma XVIII. millia CCIII sol.; pro quibus assigno vobis praedictis redditus habendos et recipiendos quosque vobis sit plenarie satisfactum de praedictis XVIII. millibus et CCIII. sol. Ita quod pagas quas G. de Piraria debebat et debet facere pro redditibus quos emit a domino Infante quondam de redditibus Maioricarum, faciat vobis sine aliqua intermissione, vel interruptione, vel quicumque alius terram istam tenuerit, vel redditus receperit praedicti domini Regis. Mandantes dicto G. de Piraria quatinus vobis respondeat de praedictis, et pagas vobis faciat, prout continentur in instrumento per alphabetum diviso, confectum inter dominum Infantem P. quondam et dictum G. de Piraria de praedictis XVIII. millibus et CC.III. sol. regalium Valenciae. Ad haec ego G. de Piraria, habito mandato praedicti Berengarii de Tornamira, promitto vobis R. Dei gratia Maioricen. Episcopo, Jacobus de Sancta Eugenia, Sacrista Maioricensi, Bernardus, Sacrista Praepositus de Gualter, Michael Violots, portarius domini Regis, A. de Ulmis. Bn. F. R. Corrigarius, Berengarius Bovis, et aliis manumissoribus domini Infantis quondam, quod dictas pagas vobis faciam de praedictis XVIII. millia. et CC. et III. sol. sine aliqua intermissione, prout continetur in praedicto instrumento diviso per alphabetum inter me et dominum Infantem quondam.
