XII.
Facultas concedendi ordinem nuncupatam de Gripho Lucretiae Dersoler
(: Dezsoler), an. MCCCCLVII. (1457) (Vid. pág. 194).
Ex arch. reg. Valent. Divers. III. ab anno 1455 ad 1457.
Alfonsus etc., magnifico et dilecto conciliario nostro Berengario Vives Boyl militi, salutem et dilectionem. Tenore praesentium nostra ex certa scientia et expresse concedimus vobis licentiam, quod vice, nomine et pro parte nostris possitis conferre amprisiam nostram, stolam videlicet candidam cum languncula (seu lauguncula) quam in honorem gloriosissimae Virginis Mariae singulis diebus sabbatinis et festivitatibus suis gestare et deferre solemus, dilectae nostrae Lucreciae Dersoler, filiae dilecti consiliarii nostri Ludovici Dersoler militis: praestito prius per eandem Lucreciam in manibus vestris iuramento, in similibus praestari solito, de servandis omnibus capitulis dictae amprisiae, quae per felicis recordationis serenissimum Dominum Regem Ferdinandum, genitorem nostrum colendissimum pro observantia dictae amprisiae in honorem dictae gloriosissimae Virginis edita fuerunt. Quae quidem Lucrecia, dicta amprisia nostra sic insignita, gaudeat et potiatur illis honoribus, libertatibus, privilegiis et immunitatibus, quibus alii eam gestantes potiuntur et gaudent, potiri et gaudere soliti sunt et debent. In quorum fidem praesentes fieri iussimus nostro communi sigillo in dorso munitis. Dat. in Castellonovo civitatis nostrae Neapolis die XVI. novembris anno a nativitate Domini MCCCCLVII. = Rex Alfonsus. = Dominus Rex mandavit michi Joanni Valerio.
