XVI.
Visitatio cathedralis Illerdensis. an. MDXXXV. (Vid. pág. 51.)
Die martis vicesima quinta mensis maii anno millesimo quingentesimo trigesimo quinto R. Dnus. Petrus Soler D. D. officialis ac visitator ecclesiae Ilerden. pro Rmo. Dno. Jacobo Conchillos, Episcopo Ilerden. processit ad visitandum ecclesiam cathedralem Ilerdae ut sequitur:
Primo visitavit sacramentum Eucharistiae et invenit illud sub multis formis renovatis et corporalibus involutis in custodia argentea paratis ad comunicandum infirmos et alios. Extant decenter.
Invenit etiam tres formas renovatas et repositas in capsa vitrea recondita in capça magna lignea depicta et involutas panno lineo nitido satis decenter.
Reservatur semper in dicto loco sacramentum Eucharistiae, etiamsi alibi extra sacristiam aliquibus communicandis defferatur cum dicta custodia et bene, que omnia invenit in tabernaculo retro altare maius depicto clave clauso et decenti.
Visitavit reliquias.
Visitavit primo sanctissimam reliquiam panni in quo Christus infans involutus fuit, et invenit in capsa argentea decenti involutum panno lineo. Honorifice tenetur continuo sub tota custodia in quodam armario in pariete sursum ad latus dextrum altaris in capella maiori dictae Sedis facto sub duabus clavibus et ab inde non extrahitur preter quam in festivitatibus Nataliciis et Ascensionis Domini nostri Jesu Christi in quibus populo cum maximo honore et solempnitate ostenditur, et per octavas dictorum festivitatum in sacristia et quodam armario clave clauso tabernaculum fabricato tenetur.
Item in quodam armario intra sacristiam invenit reliquias sequentes.
Primo in quodam reliquiario argenteo brachium S. Valerii Episcopi...
