IX.
Carta donationis insularum Evizae et Formenterae facta per Jacobum I, Aragon. Regem, Infanti Petro, filio Regis Portugaliae et Nunnoni Sancii, ante ipsarum e Mauris ereptionem, an. M.CCXXXI. (Vid. pág. 43.)
Ex transl. coaevo in arch. eccl. Maioric.
Manifestum sit omnibus quod nos Jacobus Dei gratia Rex Aragonum et regni Maioricarum, Comes Barchinone et Dominus Montispesulani, cum praesenti carta per nos et successores nostros donamus et concedimus vobis illustri Infanti dompno Petro, et vobis karissimo consanguineo nostro dompno Nunoni Sancii, quod habeatis perpetuo insulam Evize et Formentere cum suis pertinenciis universis, retenta nobis et nostris successoribus potestate omnium castrorum quae sunt ibi vel fuerint; et quod teneatis eandem insulam per nos in feudum et succesores nostros; et faciatis inde per nos pacem et guerram de Christianis et Andalucia, si dictam insulam, scilicet, adquiretis et capietis ab instanti festo Sancti Michaelis septembris usque ad duos annos. Et si forte infra vel ultra dictum spacium anni nos dictam insulam adquiremus, donamus et concedimus eam vobis, illustri Infanti dompno Petro, quod teneatis eam sub ipsis conditionibus quibus habetis regnum Maioricarum et insulam Minoricarum; salvo iure in omnibus dompni Nunonis Sancii, quod sibi penitus conservamus. Datum apud Ilerdam III. kal. octobris, anno Dni. millesimo CC. tricessimo primo. = Signum + Jacobi Dei gratia Regis Aragon. etc. = Testes huius rei sunt. = Ato de Focibus, maiordomus Aragon. = Rodericus de Lizana. = Sancius de Orta. = Blascus Maza. = Rodericus Exeminis de Luzia. = Garcia de Orta. = Pelegrinus de Bolas. = Petrus Petri, Justitia Aragon. = Sig+num Guillermi, scribae qui mandato Dni. Regis pro Petro Sancii, notario suo hanc cartam scripsit loco, die et anno praefixis.
