30. Isabella ed Elia Cairel.
Secondo la lezione di O, con alcune delle correzioni dello Schultz (Die prov. Dichterinnen, p. 22).
N' Elyas Cairel, de l'amor
qu'ieu e vos soliam aver,
voil, sius platz, qem digatz lo ver,
perque l'avetz cambiat aillor:
qe vostre chanz non vai si com solia,
et anc vas vos nom sui salvatz un dia,
ni vos d'amor nom demandetz anc tan
q'ieu no fezes tot al vostre coman.
Madomn' Eysabella, valor
joi e pretz e sen e saber
soliatz qec jorn mantener,
e s'ieu en dizia lauzor,
e mon chantar, nol dis per drudaria,
mas per honor e pron q'ieu n'atendia,
si con joglars fai de dompna prezan;
mas chascun jorn m'es anada cambian.
N'Elyas Cairel, amador
no vim mais de vostre voler
qui cambges dompna per aver;
e s'ieu en disses desonor,
eu n'ai dig tant de be q' om nol creiria,
mas ben podetz doblar vostra folia;
de mi vos dic qu'ades vau meilluran,
mas endreig vos non ai cor ni talan.
Domn', eu faria gran follor,
si stes gair' en vostre poder,
e ges per tal nom desesper,
s'anc tot non aic pron ni honor;
vos remanretz tals com la genz vos cria,
et ieu irei vezer ma bell' amia
el sieu gen cors grail e benistan,
que no m' a cor menzongier ni truan.
N' Elias Cairel, fegnedor
resemblatz segon mon parer,
com hom qis feing de dol aver
de zo dont el no sent dolor.
sim creziatz, bon conseil vos daria
qe tornassetz estar en la badia;
e nous auzei anc mais dir mon semblan,
mas pregar n' ei lo patriarch' Ivan.
Domn' Eysabel', en refreitor
non estei anc mattin ni ser;
mas vos n'auretz oimais lezer,
q' en breu temps perdretz la color.
estier mon grat mi faitz dir vilania,
et ai mentit, q'eu non crei q'el mond sia
domna tant pros ni ab beutat tan gran
com vos avez, per q' ieu i hai agut dan.
Sius plazia, n' Elyas, ieu volria
qem disesses qals es la vostr' amia,
e digatz lom e no i anetz doptan,
q'eus en valrai, s'ela val ni a sen tan.
Dompna, vos m'enqerretz de grant follia,
qe per razon s'amistat en perdria;
qe per paor qe lauzengier mi fan,
pero non aus descubrir mon talan.
