XXXIII.
Constitutio de non sepeliendis intra ecclesiam cathedralem Maioricensem corporibus defunctorum, qui in eadem beneficium ecclesiasticum non instituerint, anno MCCCXLI. (Vid. pág. 190.)
Ex folio coaevo Massuto Actis capitul. eccl. aioric (Maioric.)., anno 1372.
In Dei nomine. Amen. Decet domum Domini, id est, Maioricensem ecclesiam, ad laudem et gloriam summi Dei et gloriosae Beatae Mariae, Genitricis ipsius dedicatam, in qua divina ministrantur officia, divinum invocatur auxilium, orationes exaudiuntur fidelium, cum debita reverentia venerari, ut (Domino) grata, et ad eam convenientibus placida, pulcra et decora dinoscatur. Quia igitur ex frequenti sepultura corporum illorum qui intus dictam ecclesiam eligunt sepeliri, ecclesia ipsa, quae semper odorifera esse debet, inmunda redditur et infecta, nec sit conveniens quod talis sacer locus indistincte cadaveribus impleatur; ea propter nos Berengarius permissione divina Maioricen. Episcopus, et nos Berengarius de Durbanno, Archidiaconus, Raymundus Messagueri, Praecentor, Petrus de Turri, Uguo de Terrione, Guillermus Villae, Arnaldus Squerdi, Raymundus Pellicerii, Guillermus Paschalis, Bernardus de Muredine, Nicholaus de Salis et Bernardus Salati, canonici Maioricenses, praesentes et Capitulum facientes, coeteris concanonicis dictae Sedis a civitate et diocesi Maioricen. absentibus, qui ad talia de consuetudine minime consueverunt vocari, deliberatione et tractatu habitis, consuetudinem de non sepeliendis aliquibus intus dictam ecclesiam, nisi in illa instituerint beneficium et anniversaria, observatam hactenus, approbantes, hac constitutione valitura perpetuo statuimus et statuendo ordinamus quod amodo nullus in dicta ecclesia nostra Maioricen. intus corpus dictae ecclesiae sepeliatur, nec sepultura inibi alicui concedatur, nisi in eadem instituerit cappellaniam seu beneficium perpetuum sacerdotale annui valoris decem octo librarum regalium Maioricen., quitiarum de octavo, et anniversarium quinquaginta solidorum dictae monetae, quitiorum pariter ab octavo, cum quibus possint inibi sepeliri uxores, filii et nepotes ex filiis descendentes...
Acta fuerunt hoc Maioricis in palacio episcopali civitatis Maioricarum die jovis intitulata duodecimo kalen. octobris, anno Domini M.CCC. quadragessimo primo. = Sequuntur subscriptiones praedictorum.
