IX. Tarraconensis ecclesiae, preces, Innocentium Papam III, Sparagi (1214)

IX. 

Tarraconensis ecclesiae ac provinciae preces ad Innocentium Papam III. directae pro obtinenda D. Sparagi in Tarraconensem Archiepiscopum electionis confirmatione, an. MCCXIV. (1214) (Vid. pág. 80.) 

Ex autograph. in arch. eiusd. eccl. 

Sanctissimo Patri et Domino suo J. Dei gratia summo Pontifici universus clerus et populus Tarrachonae salutem et totius obedientiae famulatum. Cum fortuna gravis flebilisque casus longae et diuturnae infirmitatis Domini nostri R. Tarracon. Archiepiscopi, piae recordationis viri, ecclesiam nostram ipsius solatio et providentia, permittente Domino, miserabiliter viduasset, ipsaque dampnis multiplicibus exposita et periculis remansisset, pii patris consilio destituta, summa et ineffabilis bonitas Dei Omnipotentis noluit eam viduitatis languore deficere diutius et dolore, in idoneum sibi sponsum clementer providens, et nobis salubriter in rectorem. Nam nuper cum habita quorundam Episcoporum praesentia et sensu, nacto etiam ab aliis suffraganeis consensu, qui interesse electioni non potuerunt, sicut per suas se excusavere litteras, rationabiliter, ut credimus, praepediti, sancte et juste et canonice sicut decuit ac secundum Deum de substituendo pastore concorditer tractaremus, ita mentes nostras divina gratia univit quod oculos levantes ad coelum et Sancti Spiritus gratiam lacrimabiliter invocantes uno animo, uno sensu ac voce in venerabilem S. Pampilon. Episcopum (pamplonense, pamplonica, Pamplona) unanimiter convenimus universi, virum utique genere regio nobilem, sed moribus longe nobiliorem, bonaeque et illesae opinionis, et quantum humana fragilitas nosce sinit, honestis moribus hornatum, humilitatis et patientiae dono praeditum, castitatis, hospitalitatis et caritatis munere insignitum: in quo quidem bona discretio et litteratura sufficiens viget, cum sit in sacris scripturis et utroque jure sufficientissime eruditus. In rebus etiam et negotiis ecclesiasticis providum et sollicitum declarat Pampilonensis ecclesiae status quam fideliter, et utiliter, et prudenter rexisse illius patriae testimonio comprobatur. Ipsi igitur gratias exolventes, qui solus est consolatio tribulatis, magestatis et sanctitatis vestrae pedibus toto affectu et animo provoluti, clementiam vestram prona mente rogamus, et obsecramus obnixe, quatinus postulationi, et tam sanctae electioni ejusdem confirmationis facilitatem adhibeatis et robur, ipsum nobis postulatum patrem et pastorem misericorditer concedatis, et ad ecclesiam Terraconensem, cui in ejus et ex ejus absentia tam in capite quam in membris, ex multa malitia … ex defectu Principis noviter seviente, nonulla pericula ... nunc perturbationibus subiaceat, et molestiis pravorum ubique saevitia immaniter saeviente, pacis nusquam et saecuritatis tranquilitate vigente, et ipse pastorali sollicitudine et potentia regiae parentelae, qua in terra nostra et partibus Ispaniae praepotens est, et multa tantis dispendiis sciat et possit, et audeat consulte ocurrere, et viriliter obviare. Necesse est, admodum Sancte Pater, ut nos et Tarraconensem provintiam ejusdem postulati festino reditu, et jocundo, ejus, si placet, negotio breviter et foeliciter expedito, quantocius letificare velitis. Ut autem vota omnium nostrum in hanc electionem indubitantes convenire noscatis huic canonico decreto propriis manibus roborando subscripsimus octavo kalendas martii anno Domini MCC.XIV. = Sig+num Petri Urgellen. Episcopi. = Ego Poncius Dertusen. Episcopus subscribo. = Ego Raymundus Tarraconensis ecclae. Praepositus subscribo. = Ego A. Tarraconensis ecclae. Archid. subscribo. = Ego Raymundus Guillelmus Tarraconens. ecclae. Camerarius subscribo. = Sig+num Raymundi … Tarraconensis ecclae. Sacristae. = Sig+num F. Tarraconen. ecclae. minoris Sacristae. = Ego Magister Jacobus, Prior claustralis confirmo. = Sig+num Guillermi Praecentoris Tarracon. = Ego Bertrandus Cornubovensis (Escornalbou) Prior subscribo. = Ego Arnaldus Tarraconen. ecclae. operarius subscribo. = Sig+num Guillermi de Peral. = Ego B. de Castelleto Tarrachon. = Ego Johannes Dertosae subscribo. = Sig+num Petri de Manlevo. (Manlleu) = Ego R. de Barberano subscribo. = Ego R. de Casta subsig+no. =  Sig+num Johannis de Sancta Digna. = Sig+num A de Ferigola. =  Sig+num A. Palombarii. = Ego Petrus Rotbertus mandato Capituli hoc scripsi.

XXII. Concessio cimiterii publici hospitali S. Nicolai an. MCCXXVI.

XXII. 

Concessio cimiterii publici hospitali S. Nicolai an. MCCXXVI. (V. pág. 83.) 

In Dei nomine: Sit notum cunctis, quod Ego Guillelmus Dei gratia Vicens. Episcopus, ad honorem Dei, et servitium ejus, et Beati Nicholai, et sustentamentum peregrinorum et pauperum Jesu Christi, ad instantiam et praeces Nobilis et Venerabilis Viri Guillelmi de Angularia, et Dominae Sibiliae uxoris ipsius, rogatu etiam et consilio ac licentia Domini Sparagi Taraconen. Archiepiscopi, et quorundam religiosorum virorum, concedo et assigno perpetuo Hospitali sive loco S. Nicholai, quod praefati nobiles ob remedium animarum suarum, et parentum suorum, pie constuxerunt in Episcopatu Vicen. in termino de Alfandarela et de Palatio, sub regula ordinis de Premoster., Cimiterium publicum, et liberam sepulturam omnium, qui ibi sunt vel fuerint, et etiam omnium aliorum, tam de Episcopatu Vicen; quam aliorum, qui ibi eligere canonice voluerint sepulturam. Ita tamen quod major ipsius domus, et omnes, qui ibi vitam suam ducere, et Domino servire elegerint, cum ipso loco et Ecclesia sint mihi et successoribus meis perpetuo, tamquam Episcopo suo, subjecti, et reverentiam exhibeant, et in signum subjectionis, Prior sive alius quilibet, qui illi loco et Ecclesiae in posterum praeponetur, postquam electus vel prepositus ibi fuerint, mihi et successoribus meis successive pro se et suis Sociis et loco illo, manualem sine contradictione aliqua obedientiam exhibere canonice teneatur, et de omnibus bonis mobilibus et immobilibus, quae morientes sepulturam ibi eligentes, loco praedicto pia devotione contulerint, habeat Ecclesia, de cujus parochia fuerint, et Episcopus Vicen. si de suo Episcopatu fuerint, integre tertiam partem, reliquis duabus partibus penes dictum locum sive hospitale remansuris. Et ad hoc fideliter exequendum tenatur tam major illius loci, quam alii qui ibi fuerint universi. Et Ego G. de Angularia, et uxor mea Sibilia cum multiplici gratiarum actione, et humilitate, ac devotione recipimus concessionem et donum istud pro dicto loco, et illis qui ibi sunt vel fuerint, a vobis praedicto G. Vicen. Episcopo; et promitimus vobis et successoribus vestris per nos et omnes posteros nostros omnia praedicta servare et compelere, quantum ad nos pertineat, et illos qui in loco illo sunt vel fuerint, et facere et compellere, illibata servare et attendere integre sine fraude. Et haec omnia vobis promitimus bona fide, et Domino Jesu Christo, et sub obtestatione divini judicii, attendere et complere, et facere compleri singula et universa, sicut superius est praemissum. Ego autem G. Vicen. Episcopus supra dicta facio et concedo, salvo jure Vicen. Ecclesiae ejusdemque Episcoporum. Actum est hoc VIII. Idus Aprilis anno Domini M.CC.XXVI. Guillelmus Ausonen. Episcopus. Ego S. Tarraconen. Archiepiscopus subscribo. = Sig+num T. Praepositi Tarraconen. Ego R. de Capraria Vicen. Canonicus subscribo. = Sig+num R. de Pinos. Fr. G. de Morlans. Fr. B. Abbas Sancti Nicholai. Fr. Vitalis Subprioris. = Sig+num G. praedicti de Angularia. = Sig+num Domni S. uxoris ejus. = Sig+num Guillelmi filii eorum, qui hoc firmamus, concedimus, pariter laudamus et testes firmare rogamus. = Sig+num Gaudcerandi de Pinos. = Sig+num Bernardi de Rubio. = Sig+num Berengarii de Anglesola, qui hoc laudo et firmo. Sig+num R. Berengarii de Ager. Ego Genaldus Capellanus de Granana et Decanus, qui hoc firmo, in cujus praesentia Dom. Sibilia de Angularia et Guillelmus filius ejus firmaverunt. Bernardus (hay una t al final, Bernardust) Capellanus Dom. Sib. de Angularia scribo pro teste, et hoc signum fecit. Pontius Scriba Dom. Guill. Vicen. Episcopi qui hoc scripsi die et anno quo supra.