XLIX.
Una cieutat fo, no sai quals,
On cazet una plueia tals
Que tug l' ome de la cieutat
Que toquet foron dessenat.
Tug dessenero, mas sol us;
Aquel escapet e non plus,
Que era dins una maizo
On dormia, quant aco fo:
Aquel levet, quant ac dormit
E fon se de ploure gequit,
E venc foras entre las gens
L' us fo vestis, e l' autre nus,
L' autr' escupi vas lo cel sus;
L' uns trais peira, l' autre astelas,
L' autre esquisset sas gonelas,
L' uns feri e l' autre enpeis,
E tenc se ricamens pels flancx,
E l' autre sautet per los bancx;
L' us menasset, l' autre maldis,
L' autre ploret e l' autre ris,
L' autre fes metoas de se.
Meravilhet se molt fortmen,
E vi ben que dessenat son;
Si negun savi n' i veira;
Grans meravelhas ac de lor;
Mas molt l' an els de luy maior,
Qu' el vezon estar saviamen;
Car so que ill fan no ill vezon faire.
A quascun de lor es veiaire
Que ill son savi e ben senat,
Mas lui tenon per dessenat;
Qui 'l fer en gauta, qui en col;
El no pot mudar no s degol.
L' uns l' enpenh, l' autre lo bota,
El cuia eissir de la rota;
L' uns l' esquinta, l' autre l' atrai,
El pren colps e leva e chai.
Cazen, levan, a grans ganbautz
S' en fug a sa maizo de sautz,
Fangos e batut e mieg mortz;
Et ac gaug quan lor fon estortz.
Aquesta faula es al mon
Semblan et a tug silh que i son;
Aquest segles es la cieutatz,
Que es totz ples de dessenatz;
Qu' el maior sen c' om pot aver
Si es amar dieu e temer,
E gardar sos comandamens:
Mas ar es perdutz aquel sens;
La plueia sai es cazeguda;
Una cobeitatz es venguda,
Uns orgoills et una maleza
Que tota la gen a perpreza;
E si dieu n' a alcun onrat,
L' autr' el tenon per dessenat
E menon lo de tom en vil,
Car non es del sen que son il,
Qu' el sen de dieu lor par folia;
E l' amicx de dieu, on que sia
Conois que dessenat son tut,
Car lo sen de dieu an perdut;
E 'lh tenon lui per dessenat
Car lo sen del mon a laissat.
Pierre Cardinal.
Cap comentari:
Publica un comentari a l'entrada
Els comentaris de robots o de malparits i malparides catalanistes s´esBURRaran.
No us mateu, agafeu un llibre.
Nota: Només un membre d'aquest blog pot publicar entrades.