23. Peire de la Caravana o Cavarana. D' un serventes faire es mos pessamenz,

23. Peire de la Caravana o Cavarana.

Dai canzonieri D I K; cf. Canello (in Giorn. di filol. rom. III, 6).

D' un serventes faire es mos pessamenz,

quel pogues retraire viatz e breumenz,

quel nostr' emperaire ajosta grans genz.

Lombart, beus gardatz que ja non siatz

pejer que compratz, si ferm non estatz.

per vos far contendre 

De son aver prendre nous mostratz avars, 

per vos far contendre ja non er escars;

sil vos fai pois prendre, l'avers er amars.

Lombart, beus gardatz &c.

De Pullaus sovegna, del valenz baros,

q'il non an que preingna for de lor maisos; 

gardatz non deveingna autretal de vos,

Lombart, beus gardatz &c.

La gent de la Maigna non voillaz amar,

ni la soa compaigna nous plaza usar,

c'ar cor m'en fai laigna ab lor sargotar.

Lombart, beus gardatz &c. 

Grantnogles resembla en dir brod et guatz;

lairan qant se sembla c'uns cans enrabiatz;

no voillatz ja venga, de vos los loignatz.

Lombart, beus gardatz &c.

Deus gart Lombardia, Boloigna e Milans, 

e lor compaignia, Bresa e Mantoans,

c'us d'els sers non sia, els bos Marquesans. 

Lombart, beus gardatz &c.

Deus sal en Sardeingna mon Malgratzdetotz, 

car genz viu e reingna e val sobre totz,

c'us tant larc non seingna de neguna votz.

Lombart, beus gardatz &c.

Saill d'Agaitz, bem platz car tant gent regnatz 

Verones honratz e si ferm estatz.

Lombart, beus gardatz &c.

/ Versión de Raynouard /

22. Il marchese Lancia e Pietro Vidal. Emperador avem del tal maneira,

22. Il marchese Lancia e Pietro Vidal.

Secondo il testo ricostituito dal Bartsch (Peire Vidal's Lieder, n. 33).

Emperador avem del tal maneira, 

que non a sen ni saber ni membransa; 

plus ebriacs no s' assec en cadeira

ni plus volpilhs no port' escut ni lansa, 

ni plus avols non causset esperos, 

ni plus malvatz no fetz vers ni chansos: 

res non es meins mas que peiras non lansa. 

Espaza volh que sus pel cap lo feira, 

e dartz d'acier volh quel pertus la pansa, 

e brocas volh quel tragan de lumeira; 

pois li darem del vi, en loc d' onransa 

un velh capel d' escarlat ses cordos, 

e sa lansa sera us loncs bastos; 

pois pogr' anar segurs d'aqui en Fransa. 

Lanza marques, paubreza e nesceira 

vos chocan fort, dolors e malanansa, 

et etz com l'orbs que piss' en la carreira, 

quant a perdut la vergonh' e membransa; 

plus soven vens castels e domejos

no fai velha gallinas ni capos,

e s' anc fos francs, ar es sers ses duptansa.